Kearen Artxibogileak. Ibilbide bat Tabakaleratik (2023) dokumentala online ikusi daiteke jada, Tabakaleraren webgunean. Kearen artxibogileek asteburuan aurkeztu zuten, Donostiako Kultura Garaikidearen Nazioarteko Zentroko zinema aretoan.
‘Kearen Artxibogileak. Ibilbide bat Tabakaleratik’ dokumentalaren aurkezpen-saioa, Tabakaleran.
Tabakalerako espazioetan zehar egindako ibilbide elkarrizketatua erakusten duen ikus-entzunezkoa aurkeztuko dute asteburuan kultura garakidearen zentro donostiarreko zinema aretoan. Kearen artxibogileak. Elkarrekin lan egiten duten emakumeak proiektu kolektiboaren baitan ondu dute partaideek, eta tabako fabrikako langile ohiak zein gaur egungo kultura zentrokoak ditu protagonista.
“Kearen Unibertsitatea” deitzen zioten fabrikari garai bateko langileek, izan ere, zigarroak egiteaz gain, gauza asko bizi, partekatu, ikasi, borrokatu eta ospatu zituzten. Lupe, Asun, Susi, Marivi, Clara, Pili eta Maite izango dira guztien ordezkari, eraikinaren iraganaren eta orainaren arteko irakurketa kritiko honen ahotsak. Kearen artxiboan bildutako materialak, eta emakume taldearen begiradak eta bizipenak biltzen ditu lanak.
Bada, aurkezpen ofiziala egin ondotik, Tabakalerako atarian jarri dute pieza ikusgai. Kearen Artxibogileak. Ibilbide bat Tabakaleratik izenarekin, 56 minutuko iraupena duen pieza dokumentala da. Gaztelera du hizkuntza nagusia, baina euskarazko zein ingelesezko azpitituluekin ikusteko aukera dago.
Ikusi filma, hemen.
Artxiboan arakatuz
Kearen artxibogileak proiektua urte askotako talde-lanaren emaitza izan da, memoria, artxiboa eta komunitatearen eraikuntzari buruzkoa. Aldizkako bilerak egiten dituzte 2016ko irailaz geroztik, Tabacalerako eta Tabakalerako istorioei buruzko artxibo komunitario bat eraikitzeko helburuarekin, besteak beste. Artxibo horren lehen bertsio digitala Makusin, Tabakaleraren artxibo digitalean kontsulta daiteke.
Argazkiak, agiriak, bideoak, audioak eta objektuak barne hartzen ditu. Horietako batzuk lan-prozesuan zehar sortutakoak dira, baina asko eta asko, Tabakalerako langile ohiek urte luzez etxean gordetakoak. Azken horiek iraganaren irakurketa kritikoa egiteko aukera ematen dute eta, beraz, baita orainaldiarena ere.
Proiektuari buruzko informazio osagarria, jarraian.
