Pablo Agueroren Akelarre lana, igaro berri den Goya sarien azken edizioko filmik sarituenetako bat, Netflix onlineko plataformaren katalogoan dago eskuragarri.
1.609 urtera bidaiatuko du filmak, sorgin ehizak indarra hartu zuten garaira hain zuzen, eta eskualde txiki bateko biztanleengan jarriko du fokua. Zonaldeko gizonak itsasoz bestaldera irten dira beharrean, eta inguruan geratutako emazte, alaba eta ahizpak basoan bilduko dira ospakizun handi baterako.
Rostegi epailea da Erregeak eskualdea garbitu eta kontrolpean edukitzeko izendaturiko pertsona, eta haren aginduz jaialdian parte hartu duten hainbat emakume atxilotuko dituzte. Amaia protagonista izango da horietariko bat. Bere handinahietarako giltza izango delaren konbentzimenduz, Rostegik amaieraraino eutsiko dio jazarpenari, eta hasiera batean erresistentzia agerikoa erakutsiko dion Amaiak ere men egingo die haren nahi ilunei. Uste baino baino mederakaitz eta zuhurragoak dira, ordea, gaztearen asmoak.
Pierre Lancre legelari frantsesaren Tratado de brujería vasca: descripción de la inconstancia de los malos ángeles y demoniosliburuan oinarritu da Agüero bere bosgarren filma izango denaren sorrerarako, eta talde artistiko gazte batek hezurtu du pantaila handirako kontakizuna. Amaia Aberasturi eta Alex Brendemühl izango dira aktore nagusiak, Amaia eta epaile protagonisten azalean jarriko diren profesionalak, eta beste bost aktore gazteren laguntza izango dute, urte bete iraun zuen hautaketa prozesu luze baten bidez aukeratu dituztenak: Garazi Urkola, Irati Saez de Urabain, Jone Laspiur, Lorea Ibarra eta Yune Nogueiras. Daniel Fanegok, Asier Oruesagastik, Iñigo de la Iglesiak, Elena Urizek eta Daniel Chamorrok osatuko dute taldea.
Arlo teknikoari dagokionez, ibilbide luze eta arrakastatsuko profesionalak aritu dira lanean: Javi Agirre izango da argazki zuzendaria; Mikel Serrano arte zuzendaria; Maite Arroitajauregi ‘Mursego’-k jarri dio doinua, Arantzazu Calleja musikariarekin batera; eta Kowalski Films, Gariza Films eta Lamia Producciones dira ekoizleak.
Bost Goya sari
Euskal ekoizpenen artean faborito nagusia zen XVII. mendeko sorginen-ehiza ardatz duen Pablo Agüeroren filma, bederatzi hautagaitzarekin. Filmak kutsu mitologikoa du, fantasia eta errealitatearen arteko mugan egiten du dantza, eta guzti horri forma emateaz arduratu da bost garaikur erdietsi dituen talde tekniko eta artistiko zabala. Izan ere, Nerea Torrijos jantziteria arduraduna; Beatushka Wojtowiez eta Ricardo Molina, makillaje eta ile-apainketa arduradunak; Mariano Garcia Marty eta Ana Rubio, efektu berezien arduradunak; Maite Arroitajauregi eta Arantzazu Calleja, soinu bandaren egileak; eta Mikel Serrano, zuzendari artistikoa saritu dituzte Espainiako Zinemaren Akademikoek.
