Has dadila zinemaren 69. festa!
Heldu da 69. Donostia Zinemaldia! Gaur, irailak 17, 21:00etatik aurrera Kursaal Auditoriumean egingo duten galak emango dio hasiera bederatzi eguneko zinemaren jaiari. Harkaitz Cano idazle eta gidoilaria arduratu da, beste behin ere, saioaren gidoia osatzeaz, Ane Garciak lagun, eta Jon Maya dantzari eta koreografoak zuzenduko du emanaldia. Antolatzaileen hitzetan, besarkadak izango dira aurtengo galaren protagonista nagusiak, Marion Cotillard aktoreari emango dioten Donostia Sariarekin batera.