Zinema jatorrizko bertsioan eta euskarazko azpitituluekin eskaintzen duen Filmazpit zikloaren azken emanaldia egingo dute bihar, Gasteizko Oihaneder Euskararen Etxean. Saioa 19:00etan hasiko da, eta SUK SUK (Ray Yeung, 2019) filma emango dute.
Hiru dira Donostiako Kresala zineklubak apirilerako programatu dituen emanaldiak, eta Aste Santuari lotutako hilabetea izanagatik, interpretazio berri bat eman eta maitasunarekin lotu nahi izan dute. Hala, amodiozko istorioekin beteko dute Trueba zinema aretoa, tartean, igaro berri den Bilboko Zinegoak jaialdian FIK saileko epaimahairen aipamen berezia lortu duen Suk Suk (2019) hongkongdarra.
Asteburuan eman diote amaiera bi astez luzatu den Zinegoak Bilboko Gaylesbitrans Nazioarteko Zinema eta Arte Eszenikoen Jaialdiaren 18. edizioari, eta sari banaketa ekitaldian nabarmendu dituzte aurtengo proposamen berezi eta borobilenak. Jaialdiaren sari nagusia Nicol Ruiz Benavidesen La nave del olvido txiletarrarentzat izan da.
