Harkaitz Canok gidatuta, ikus-entzunezko sorkuntza kolektibo bat garatuko dute 10 partaidek, Donostiako Kultura Garaikidearen Nazioarteko Zentroan. Izen-emate deialdia urtarrilaren 31ko 12:00ak arte dago zabalik.
Marguerite Duras ardatz hartuta, zinema eta literatura uztartzen dituen zikloaren otsaileko gonbidatua izango da Harkaitz Cano idazlea. Claire Simonek zuzendutako Vous ne désirez que moi (2020) aurkeztuko du, hilaren 15ean.
Harkaitz Cano idazleak eta Unai Zaballa Etxepare Institutuko irakurleak Euskal zinema atzerrian kitzikagarri egiteko gida laburra izeneko saio laburra eskainiko dute datorren uztailaren 20an, Euskal Herriko Unibertsitateak atonduriko ‘Bikaintasuna Euskal Ikasketetan XIII: Euskal kultura nazioartean eta eremu eleanitzetan irakasteko lantegia’ udako ikastaroaren baitan.
Urriko Bikografiak: bi ibilbide elkarrizketan saioan Mireia Gabilondo aktore, zuzendari eta gidoigilea eta Harkaitz Cano idazlea elkarrizketatuko ditu Donostiako Bagera Euskaltzaleen Elkarteak. Bihar, urriak 18, egingo dute hitzordua, Jon Olano kazetariaren gidaritzapean.
Black is Beltza II: Ainhoa filma 2022ko irailaren 30ean iritsiko da Hego Euskal Herriko zinema aretoetara. Fermin Muguruzak sortutako proiektua Gerra Hotzaren amaieran kokatuko da, eta Manex Unanueren alaba, Ainhoa, izango da protagonista.
Harkaitz Cano idazle eta gidoilariak euskal zinema hizketagai duen ikastaroa gidatuko du Chicagoko Unibertsitatean. Jarduera martxoaren 28tik 4ra garatuko da, Etxepare Euskal Institutuak sustatzen duen Koldo Mitxelena Katedraren baitan.
Donostia Kulturak eta Euskadiko Filmategiak elkarlanean antolatutako aurtengo Nosferatu zikloa Luis Buñuel zinemagile aragoiarrari eskaini diote, eta honi lotutako euskarazko argitalpena azaroaren 10ean aurkeztuko dute Tabakaleran. Harkaitz Canok idatzi du Kandelikara – Buñueli buruzko film baterako apunteak izeneko liburua.
Heldu da 69. Donostia Zinemaldia! Gaur, irailak 17, 21:00etatik aurrera Kursaal Auditoriumean egingo duten galak emango dio hasiera bederatzi eguneko zinemaren jaiari. Harkaitz Cano idazle eta gidoilaria arduratu da, beste behin ere, saioaren gidoia osatzeaz, Ane Garciak lagun, eta Jon Maya dantzari eta koreografoak zuzenduko du emanaldia. Antolatzaileen hitzetan, besarkadak izango dira aurtengo galaren protagonista nagusiak, Marion Cotillard aktoreari emango dioten Donostia Sariarekin batera.
Kalakalab elkarteak eta Garaion Naturartea elkarteak, Zineleku ekimenaren testuinguruan, Sustraiak izeneko idazketa laborategia antolatu dute. Hiru eguneko egonaldia izango da Garaion (Araba), ekainaren 20tik 22ra, eta parte hartzaileek ikus-entzunezkoen proiektu baten ideia garatu eta idazteko aukera izango dute Harkaitz Cano eta Katixa Agirre idazleen laguntzarekin. Izen-ematea maiatzaren 18an itxiko dute.
Gasteizko Oihaneder Euskararen Etxeak egitasmo berria jarri du martxan 2021ean: kultura diziplina ezberdinetako sortzaile arabarrei zuzendutako TopAraba deialdia. Euskarazko kultura sormena sustatzea, berrikuntza suspertzea eta sortzaileen artean sarea garatzea ditu helburu, eta abiapuntua otsailaren 27an, larunbata, egingo duten topaketa izango da. Izen-ematea zabalik da.
