Espainiako Arte eta Zinema Zientzien Akademiak ikus-entzunezko sektoreko emakume profesionalei zuzendutako kanpaina abiatu du akademiko izan daitezen sustatzeko. 2025a baino lehen bat egiten duten guztiak urtebetez kuotak ordaintzetik salbuetsita egongo dira.
Fikziozko gidoiak galdegin ditu Gidoi – Euskadiko Gidoigileen Elkarteak. Idazkiak gaztelaniazko edota euskarazkoak izan daitezke, eta maiatzaren 24an (14:00etan) itxiko dute izen-ematea.
Euskal Herri osoko emakume zuzendari berrien film luzeen proiektuak tutorizatzeko eta laguntzeko Eusko Jaurlaritzak eta Tabakalerak kudeaturiko NOKA Mentoring programak 2024ko deialdia zabaldu berri du. Otsailaren 26ra bitartean aurkez daitezke proposamenak.
2023an, ikus-entzunezko atal berri bat inauguratu dugu ZINEA atarian. Euskal Herriko zinema zuzendarien filmografiak errepasatzeko asmoz, bideo sorta osatzen joango gara FILMOGRAFIAK izenburupean. Izan zirelako gara eta, noski, garelako izango dira. Doakie, beraz, gure begirunea. Euskarazko zinemagintzaren izen handi bezain ahaztua dugu Mirentxu Loyarte (Iruñea, 1938). Bi film baino ez ditu zuzendu -Irrintzi (1978) eta Emakumeak (1981. Ikuska 12)-, baina utzitako ondareak ez du etenik.
Irudiak memoriarekin izenpean, hiri buruzagiko Golem Baiona aretoan ospatuko da, apirilaren 17tik 21era, Memoriaren Nafarroako Institutuak antolatutako V. Ikus-entzunezko Topaketa. 1936 urteko indarkeriarekiko begirada kritikoa, non bereziki emakumeek jasandako ondorioetan arreta jartzen duten hamaika lan erakutsiko diren.
Herriko emakumeen memoria berreskuratzea helburu duen proiektua aurkeztuko du Raquel Calvo zuzendariak, martxoaren 11n, Zugaza Zineman. Saioa 12:00etan izango da, eta bertaratu nahi dutenek aldez aurretik eskatu beharko dute gonbidapena huts.lab@gmail.com eta huts@huts.eus korreo elektronikoetara idatzita.
Euskal Herriko Arkitektoen Elkargo Ofizialaren (EHAEO) Bizkaiko Ordezkaritzak, ekainera arte 6 zinema-saio hartuko dituen ‘Emakumea, zinema eta hiria’ zinema-zikloa egingo dutela iragarri du. Emanaldiak hileko azken asteazkenetan izango dira, ordezkaritzako ekitaldi-aretoan, 19:00etan, eta sarrera librea izango da leku guztiak bete arte.
Emakumeek zuzendutako zineman jarriko du fokua hogeita zazpigarrenez Zinemakumeak gara! film erakustaldiak. Urriaren 17tik 28ra bitartean egingo dute arazo politiko eta sozialei buruzko bidegabekerien inguruko hausnarketa eta salaketei so.
IPES Fundazioaren eta Golem zinemen elkarlanari esker, Iruñea zinemaren topaleku bilakatu dute egunotan. Iragan ostiralean ekin zioten Zinemaren eta Emakumeen 36. Nazioarteko Erakusketari, eta irailaren 17ra bitartean dozena bat emanaldi egingo dute.
Profesionalizaziorako bidean dauden eta ikus-entzunezkoaren arloa bidean egin nahi duten emakumeen jarduna bultzatzeko mentoretza-programa da AUKERA. Proiektuak aurkezteko deialdia maiatzaren 8ko 00:00ak arte luzatzea erabaki dute arduradunek.
