Azaroaren 11n, mendia eta abentura batzen dituen Mendi Tour mostra ibiltariko filmak ikusteko aukera egongo da Portugaleten, eta Euskal Herriko eta Kantabriako hainbat herritatik igaro ostean, Sopelan emango diote bukaera aurtengo saioei, hilaren 20an. 31 geltokitan 8 mila ikusle izan ditu urtarrilaz geroztik.
Abenduaren 4tik 13rako BBK Mendi Film Bilbao-Bizkaia jaialdiaren 13. edizioa ate joka dugunean, bost Mendi Tour emanaldi iragarri berri dituzte azarorako. Errenterian (Niessen Kulturgunea), Amurrion (Amurrio Antzokia), Basaurin (Sozial Antzokia), Elgoibarren (Herriko Antzokia) eta Arrasaten (Amaia Udal Antzokia) egingo dituzte saioak.
Enrique Villareal El Drogas musikari eta abeslariari buruzko Natxo Leuzaren dokumentala Elgoibarko Ongarri zineklubean emango dute datorren azaroaren 12an, 19:00etan. Donostia Zinemaldian estreinatu zuten Barricada taldeko buru ohiaren ibilbidea jasotzen duen ikus-entzunezkoa, eta aretoetara egin zuen jauzi irailean bertan.
