Etxepare Euskal Institutuak aditzera eman duenez, 2020ko Kimuak katalogoa osatzen duten zazpi laburrak Edinburgon eskainiko dituzte gaur, ekainak 18, eta hilaren 25era arte, programazioaz online gozatzeko aukera izango da aurrenekoz Erresuma Batuan, FesthomeTV plataformaren bidez. CinemaAttic jaialdiaren bidez egingo dute saioa Eskoziako Institutu Frantziarrean.
Proiektuaren hamargarren urteurrena ospatzeko asmoz, eta koronabirusaren krisialdiaren eraginez ezarritako osasun-larrialdi egoera aprobetxatuz, Erresuma Batuan zinema espainiar independentea hedatzeko intentzioz sortutako CinemaAttic plataformak eta Cervantes Institutuak CinemAttic Cuarentena | 90 cortos españoles esenciales de la última década egitasmoa jarri dute martxan. Astero-astero film laburrak ari dira ikusgai jartzen, eta tartean ekoizpen euskal herritarrak ere badaude.
Zenbaki borobila da hogei, ospatu beharrekoa, are gehiago proiektu baten jardunaren iraupena neurtzen duenean. Kimuak: 20 years of Basque Short atzera begirakoa egingo dute Edinburgon eta Glasgowen, maiatzaren 24a eta hilaren 31a bitarte. Proiekzioez gainera, beste hainbat ekintza jasoko ditu egitarauak: hitzaldiak, mahai-inguruak eta masterclass-ak.
Iberiar penintsulako eta Latinoamerikako zinema Erresuma Batuan, eta bereziki Eskozian, zabaltzea helburu duen CinemaAttic plataformaren bidez, 2016ko Kimuak katalogoan ikusgai izan ziren zazpi laburrak eskainiko dituzte gaur, ekainak 16, Edinburgon. Atzo, halaber, animazioari eskainitako saioa egin zuten.
