Alardearen afera oinarri gisa hartuta, Aurrera egin badugu izeneko pieza dokumentala aurkeztu du Hondarribiko Jaizkibe Konpainiak. Elkarrizketa formatuko solasaldiak dira nagusi Julen Hernandez Esnaola kazetariak zuzendutako lan honetan.
Jone Laspiur donostiar gazteak hiru proiektu estreinatu ditu 68. Donostia Zinemaldian: Pablo Agüero zuzendari argentinarraren Akelarre filma, eta David P. Sañudo zinemagile bilbotarraren Ane luzea eta Alardea telesailaren lehen kapituluak. Aktore gisa egin dituen lehen lanak izan dira Laspiurrentzat, eta ustekabean etorritako aukera gustura hartu du, horren aldeko apustua egitea erabaki baitu Madrilera antzerki fisikoa ikastera joanda.
Alardea telesailaren aurrestreinaldia egin du EiTBk, Donostia Zinemaldiaren baitan Victoria Eugenia antzokian ospatu duen EiTB Galan. Urriaren 7an estreinatuko da telesaila ETB1en eta eitb.eus-en, eta asteazken gauetan izango da ikusgai.
Donostia Zinemaldiak argitu berri duenez, hamalau film luzek, hiru film laburek, bi telesailek, film ertain batek eta produkzio-fasean dagoen proiektu batek osatuko dute 68. edizioko euskal uzta. Zinema jaialdiko hainbat sailetan egongo dira ikusgai, eta horietatik 13 ekoizpen sartuko dira Euskal Zinemaren Irizar Saria eskuratzeko lehian.
