Lara Izagirre zinemagilearen Nora proposamena iragan ostiralean, irailak 3, estreinatu zuten Hego Euskal Herriko zinema aretoetan, eta asteazkenaz geroztik, Ipar Euskal Herriko zinegeletan dago ikusgai. Gaur, irailak 10, abiatuko du bigarren astea, eta kopia gehiago prestatu behar izan dituzte, filmaren harrera ona ikusita. Asteburuan film europar ikusiena izan zen EAEn.
Jean-Pierre Melville zuzendari frantziarrari eskainitako zine zikloa antolatuko dute irailaren 27tik urriaren 11ra bitartean, BilbaoArte Fundazioan. Melville Fundazioarekin, Institut Françaisekin eta A Contracorriente Films banatzailearekin elkarlanean, lau film luze eta film labur zein dokumental bana proiektatuko dituzte ArtHouse Zineman.
Hamar Goya sari jaso dituen Aitor Arregi eta Jon Garañoren Handia filma etxerako bertsioan eskura daiteke jada. DVDak eduki gehigarriak eskainiko ditu, tartean, zuzendariei egindako elkarrizketa eta filmaren making-off delakoa.
