Osasun mentalak gidoilariengan duen eragina hizketagai, Bilbon. GIDOI – Euskal Herriko Gidoigileen elkarteak gidoiak idazterako orduan sortzaileek bizi ditzaketen presioak, blokeoak eta erronka emozionalak ardatz dituen solasaldia antolatu du. FAGA – Ikus-Entzunezko Gidoilarien Elkarteen Erakundearekin batera prestatuta, eta DAMA zein SGAErekin lankidetzan, hausnarketa eta elkarrizketarako gune ireki bat izan nahi du topaketak.

Mens sana in courier sans. Osasun mentala gidoiaren munduan (eta gidoiaren mundua ez denean…) izendatu dute saioa, eta osasun mentalari buruzko II. hitzaldi zikloaren baitan kokatu dute. Sylvia Esteban psikologoa izango da hizlaria, eta Pedro Fuentes gidoigileak gidatuko du saioa. Bilboko La Bolsa eraikinean egingo dute, 19:00etan, eta bertaratzea doan da.