Hamarkada beteko du Euskal Zinema Dokumentalaren Asteak. “Garrantzia sozial handiko bost emanaldi” prestatu ditu Euskal Zinema Dokumentalaren Asteak 2024ko ediziorako. Hamargarren urteurrena ospatuko dute urriaren 21etik 25era, eta aurrenekoz, Dokumental Onenarentzako Publikoaren Saria banatuko dute, 2.000 euroko oparia dakarrena. Gasteizko Vital Fundazioak antolatuta, egoitzan bertan egingo dituzte saioak. 19:30ean hasita, filmak ikusi aurretik aurkezpen txikitxo bat egingo du gonbidatu berezi batek, eta ostean, solasaldirako tartea egongo da ere. Sarrera doan da, edukiera bete arte.
Raul de la Fuente zinemagile nafarrak Iñaki eta Nico Williams anaiei eta beren familiari buruzko Williamstarrak dokumentalak abiatuko du, gaur, 10. edizioa. 72. Donostia Zinemaldiko Zinemira sailean estreinatu da berriki, eta bi kontinente, bi errealitate eta kulturaren arteko zubi-lana du ardatz.
Bi anai futbolari, euskal herritar eta beltzek (ghanatarren ondorengoak) euren historia harrigarria erakustsiko dute euren bizitzako bi urte erabakigarrienen bidez. Qatarreko Munduko Txapelketan bi selekzio ezberdinekin parte hartu zutenekoa, 40 urteren ostean Athletic Clubek Errege Kopa irabazi zuenekoa, Nicok Eurokopan irabazi zuenekoa, etab. Nazioarteko bi izar, euren iraganarekin eta etorkizunarekin aurrez aurre, bizitza markatu dien gatazketan zehar: arrazakeria, nortasuna, frustrazioa, anbizioa, eta arrakasta.
KRITIKA | WILLIAMSTARRAK: Ez da futbola, bizitza da
https://mubi.com/es/films/the-williams/trailer
