Azaroaren 7an, osteguna,  NIFF – Navarra International Film Festival jaialdiko aurtengo lan irabazleen aukeraketa proiektatuko du Nafarroako Filmategiak. 19:30ean abiatuko dira proiekzioak, Iturramako Civivox aretoan, eta euro bateko kostu sinbolikoa izango du sarrerak.

Aniztasuna sustatzen duten lanen aldeko apustua mantenduz, eta zinema publiko guztientzako sentsibilizazio- eta kontzientziazio-tresna paregabe gisa aldarrikatuz, irailaren 19tik 21era bitartean ospatu dute aurtengo NIFF – Nafarroako Nazioarteko Zinemaldia.

Seigarren edizioa bukatuta, epaimahaikideek irabazleen berri eman zuten. Ekain Irigoienek zuzendutako Europa animaziozko lana aitortu zuten film labur onenari emandako Urrezko NIFF Sariarekin; gerratik ihes Parisera iritsi den 10 urteko Lubna du protagonista, gurasoak noiz iritsiko amestuko duena. 2.000 euro jaso ditu opari, eta zuzenean kalifikatuko da lana Goya sarietarako.

Gainera, Kote Camachoren Puzzleak lanak Urrezko NIFF DOCMA saria jaso zuen, film labur dokumental onena saritzen duena. Bestetik, Natxo Leuzareren El Que no ve Nafarroako film labur onena izendatu zuten, eta hizkuntza koofizialetan errodatutako Betiko Gaua-k (Eneko Sagardoy) irabazi zuen NIFF Poliglota saria. (Ikusi palmares osatua, HEMEN)

Bada, film saritu horien zerrenda oinarri duen hautaketa berezia osatu du Nafarroako Filmategiak, bihar, osteguna, arratsaldeko 19:30etik aurrera Iturramako Civivox aretoan erakutsiko duena:

  • Urrezko NIFF saria Nafarroako Film Labur Onenari: El Que No Ve, Natxo Leuza
  • Urrezko NIFF saria Jaialdiko Film Labur Onenari: Europa, Ekain Irigoien
  • Urrezko NIFF – DOCMA saria Jaialdiko Film Labur Dokumental Onenari: Puzzleak, Kote Camacho
  • Zilarrezko NIFF – CIMA saria: Mentiste Amanda, Eva Libertad eta Nuria Muñoz
  • Zilarrezko NIFF saria Zuzendaritza-lan OnenarI: Ilja Baumeier eta Kathrin Wüscher, Seis años, tres meses y doce días
  • NIFF New Generation saria: Chiquita Piconera, Mey Montero
  • Zilarrezko NIFF – DAMA saria Gidoi Onenari: Regreso al armario, Gerald B. Fillmore

Saio honetarako sarrerak esteka honen bidez eros daitezke. Ekitaldiak 1 €-ko prezio sinbolikoa du.