Getariako, Baionako, Donibane Garaziko, Donapauleko, Kanboko, Urruñako, Hendaiako, Hazparneko eta Donibane Lohizuneko zinemetan izango da ikusgai Negu Hurbilak (2024), Negu Kolektiboak sinaturiko lehen filma. Euskal Herriko gatazkaren amaieran kokatuta, ihesaldi baten erretratua egiten du pelikulak; Jone Laspiur du protagonista nagusia.

negu-hurbilak-nagusia

Euskal Herriko eta Espainiako Estatuko herri ugaritan otsailaren 23an estreinatu ostean, Negu Kolektiboaren Negu Hurbilak (2024) filmak herriz herriko zirkuituari eutsi zion. Begin Again banatzailearen eskutik, zinemagile euskal herritarrek eta kataluniarrek osatutako taldearen lehen fikziozko film luzea Hego Euskal Herriko udalerri ugaritan proiektatu da azken hilabeteetan, eta baita Euskal Herriko mugez kanpo ere, Espainiako Estatuan zein itsasoz bestaldean, Uruguayen, esaterako.

Bada, banatzen gaituen muga zeharkatzeko unea heldu zaio oraingoan, filmaren lehen emanaldiak iragarri baitituzte Ipar Euskal Herrian. Besteak beste, Getaria, Baiona, Donibane Garazi, Donapaule, Kanbo, Urruña, Hendaia, Hazparne, Donibane Lohizuneko zinemetan izango da ikusgai, maiatzaren 22tik aitzina.

Honakoak dira, oraingoz, zabaldu dituzten datak:

– Maiatzak 22 | BAIONA – L’Atalante, 18:45ean

– Maiatzak 23 | GETARIA – Getari Enea, 20:30 (Ondoren, solasaldia Ekain Albite zuzendariarekin)

– Maiatzak 23 | BAIONA – L’ Atalante, 20:30

– Maiatzak 24 | DONIBANE GARAZI – Le Vauban, 20:30 (Ondoren, solasaldia)

– Maiatzak 24 | BAIONA – L’ Atalante, 14:15

– Maiatzak 25 | BAIONA – L’ Atalante, 18:15

– Maiatzak 26 | BAIONA – L’ Atalante, 16:45

– Maiatzak 27 | BAIONA – L’ Atalante, 20:45 (Ondoren, solasaldia)

– Maiatzak 29 | DONAPALEU – Cinéma Saint-Louis. 20:30 (Ondoren, solasaldia)

– Maiatzak 29 | BAIONA – L’ Atalante, 16:45

– Maiatzak 30 | KANBO – Cinéma l’Aiglon, 20:30  (Ondoren, solasaldia)

– Maiatzak 30 | BAIONA – L’ Atalante, 14:15

– Ekainak 1  | URRUÑA – Itsas Mendi, 20:30 (Ondoren, solasaldia)

– Ekainak 2 | BAIONA – L’ Atalante, 20:45

 

Ihesaldi baten kontakizun isila

Isolamenduari, itxaroteari eta nortasun irrikari buruzko lana da Negu Hurbilak, eta ihesaldi baten historia kontatzen du: ETAk jarduera armatuaren behin betiko amaiera iragarri du. Emakumezko gazte bat ihesi doa helburu argi batekin: muga zeharkatzea, bai baitaki hala etxetik urrundu ahal izango dela, jaioterrian ez baitago seguru. Ihesean doala, Zubieta herrira iritsiko da. Mugako herri horretan, antzinako mitoek eta gaur egungo konfliktoek bat egiten dute, antza. Herriko etxe bateko ganbaran ezkutatuta, harria bezain mugigaitza den hango egunerokotasuna ezagutuko du. Denbora igaro ahala, egunak gau eta gauak egun bihurtzen diren leku horretan, gaztearen ihesaldia gero eta korapilatsuagoa bilakatuko da.

KRITIKA | NEGU HURBILAK: Bakardade-min isila, lainopeko labirintoan

Zubietan (Nafarroa) burutu zituzten errodaje lanak eta, hain zuzen, bertako herritarrak – Beñardo Mutuberria, Ana Hualde, Markos Juanikorena, Ibai Juanikorena eta Bautista Santesteban- aritu ziren antzezle lanetan. Haiekin batera, Jone Laspiur  da aktore profesional bakarra, neska protagonistaren azalean.

Ekain Albitek, Mikel Ibargurenek, Nicolau Mallofrék, Xalba Ramirezek eta Adrià Rocak idatzia; Albite bera eta Edu V. Romero arduratu dira edizio lanez. Javi Sevak egin ditu argazki-zuzendaritza lanak, eta Justina Monserrat aritu da arte-zuzendari. Maluta* Films (Euskal Herria) eta Cornelius Films (Herrialde Katalanak) ekoiztetxeen babesarekin.

Locarnoko 76. Zinemaldian izan zuen Negu hurbilak  filmak mundu mailako estreinaldia,  Cineasti del Presente sailean, eta Epaimahaiaren Aipamen Berezia jaso zuen.  Ostean, SEMINCI Valladolideko Nazioarteko Zinema Astean izan zuen agertoki  lanak, eta Márgenes – Madrilgo Nazioarteko Zinemaldian lehiatu da berriki, Epaimahai Gaztearen Saria lortuz.