Hollywoodeko Akademiaren galan banatu zituzten iragan igandean 85. Oscar sariak. Gaubelako irabazle nagusia eta protagonista izan zen Everything Everywhere All at Once euskaraz azpititulatuta ikus daiteke, hitzorduan saritutako beste hainbat filmekin batera.
Ezustekoek beti dute tokia Hollywoodeko Akademiaren galan, nolabait, polemikek eta espero gabeko erabakiek ematen baitiote bazka hitzorduari. Jimmy Kimmel komikoak gidatu du, aurten ere, Los Angeleseko Dolby Theatre antzokian ospatutako Oscar sarien ekitaldia, baina gorabehera handirik gabe banatu dituzte 95. edizioko estatuatxoak, halakorik esan badaiteke. Everything Everywhere All at Once filmaren arrakastak bereganatu du arreta; 11 hautagaitzarekin faborito nagusia zen, eta ez du hutsik egin.
Metabertsoak ardatz dituen abentura basatiak zazpi estatuatxo irabazi zituen igandeko hitzorduan, golardo nagusi guztiak tarteko. Bada, Movistar Plus plataforman ikus dezakezue, euskarazko azpitituluekin. Hitzorduko bigarren protagonista nagusia NETFLIXek ekoiztutako All Quiet on the Western Front film beliko alemaniarra izan da, lau garaikurrekin. Hain zuzen, plataforma horretan duzue eskuragai, euskarazko azpidatziekin.
Animazioaren arloan, euskaraz bikoiztuta ikus daitezke film onenaren saria eskuratutako Guillermo del Toro’s Pinocchio, izenak iradokitzen duen bezala, Guillermo del Toro zuzendariak ondutakoa, eta Chris Williamsek zuzendutako The Sea Beast, biak ala biak NETFLIX plataforman. Pinocchio ipuin ezagunaren stop-motion bertsio musikala duzue lehenengoa, Italia faxistan giroturikoa, eta, aldiz, bigarrena, neskato ausart batek eta itsas munstroen ehiztari ospetsu batek piztia boteretsu bat aurkitzeko jorratutako bidaia.
Hautagai gehiago euskaraz
Saririk jaso ez, baina euskaraz ikusi daiteke ere Ana de Armas aktore espainiarra emakumezko aktore onenaren golardoaren garaile bilakatu zezakeen Blonde, Marilyn Monroe munduko sex symbol ospetsuenaren historia pertsonala ausarki berrasmatzen duen drama psikologikoa. NETFLIXek sustatutako ekoizpena izaki, bertan jarri dute ikusgai.
