Irailaren 2an estreinatu zuen Amazon Prime Video plataformak inoizko telesailik garestiena dena, eta euskarazko azpilituluekin kontsumitzeko aukera egon da ordutik. Atzoz geroztik, euskaraz ere ikusgai dago. Bilboko Mixer estudioa arduratu da telesaila bikoizteaz.
Abenduaren 28an, inuzente egunez, ahalbidetu du Amazon Prime Videok The Lord of the Rings: The Ring of the Power telesailaren euskarazko bikoizketa. Zer Non Ikusi taldeak eman zuen atzo albistearen berri sare sozialetan: goizean goiz txantxa moduan; arratsaldean, aldiz, guztiz baieztatuta.
Streamiong plataformak irailaren 2an estreinatu zuen The Lord of the Rings: The Ring of the Power, inoiz egin den telesailik garestiena, eta atera ahala, ikus-entzuleek, euskarazko azpitituluekin kontsumitzeko aukera izan dituzte zortzi atalak. Bikoizketa epe motzean iritsiko zela adierazi zuten ekoizleek, baina, denborak aurrera egin ahala, berririk ez da izan. Atzora arte. Bilboko Mixer estudioa arduratu da zereginaz, eta Eraztunen jauna: Botere eraztunak izena jarri diote lehenengo denboraldiari.
Amazon Prime Videon, gainera, Tom Clancy’s Jack Ryan telesailaren hiru denboraldiak euskarazko azpitituluekin jarri berri dute ikusgai. EiTB Nahieran plataformara, bestalde, Koldo Almandozek zuzendutako Oreina (2018) igo dute egunotan.
Pantaila txikian ere handi
J. R. R. Tolkienek idatzitako eleberriak abiapuntu, Peter Jackson zinemagileak film sorta zuzendu zuen duela bi hamarkada, eta orain, formatu berrietara eguneratuta, pantaila txikira egin du salto unibertsoak. Istorioa jatorrizkoa baino milaka urte lehenago kokatu dute. Erdiko Lurraldearen bigarren aroan hasiko da, eta boterearen eraztunak nola sortu ziren kontatuko du. Baita, Sauron ilunaren sorrera, Numenor erreinuaren historia, eta elfoen eta gizakien arteko aliantza ere.
388 milioi euro inguruko aurrekontua du Patric McCkayk eta J. D. Paynek sortutako proiektuak, eta mundu mailako zinemagile eta sortzaile onenen ekarpena izan du: J. A. Bayona, Charlotte Brandstrom eta Wayne Che Yip. Aktoreen artean, berriz, Cynthia Addai-Robinson, Robert Aramayo, Owain Arthur, Maxim Baldry, Nazanin Boniadi edota Ismael Cruz Cordova. Musika Ber McCrearyk sortu du.
