Zinegin euskal zinemaldiaren 11. edizioa urriaren 20tik 23ra bitartean egingo dute, Hazparnen. Euskara hustezko fikziozko, lan dokumental eta animaziozko film labur eta luzeak emango dituzte, baita musika kontzertuak eta zenbait sorpresa ere.
2012an, Eihartzea Kultur Etxeak, Ttattola gaztetxeak eta Haritz Barne zine-gelak Zinegin festibala elkarlanean sortu zuten. Geroztik, festibalak hastapeneko xedea bati heldu dio: euskarazko filmak proiektatzea eta euskal kulturak bizitzeko behar duen arnasgune bat proposatzea. Aurten urriaren 20tik 23ra bitartean ospatuko dute jaialdia, eta fikzio, lan dokumental eta animazio film ugari eskainiko dituzte, Haritz Barne zinema-gelan.
Azken urteotan zeresan handia eman duten euskal ekoizpenak pantailaratuko dituzte 11. edizioan, besteak beste, Ane (David Perez Sañudo, 2020), Bi arnas (Jon Mikel Fernandez Elorz, 2022), O gemer (Xabier Erkizia, 2021), Altsasu (Gau hura) (Marc Parramon eta Amets Arzallus, 2021) edota Bost teilatu (Amancay Gaztañaga, Erika Olaizola, Josu Martinez, Leire Egaña, Eñaut Castagnet eta Raúl Barreras, 2022) film laburren bilduma.
Bestalde, Ezkia Ikastolarekin partaidetzan, Amikuzeko ikastolaren dokumentalaren proiekzioa hartuko du Zinegin festibalak, eta haurrentzako Yoko eta lagunak (Juanjo Elordi eta Rishat Gilmetdinov, 2015) animaziozko lana eskainiko dute. Gainera, hilaren 22an, “infernua, sua eta munstroak” protagonista izango dituen film sataniko bat emango dute, oraindik argitu ez dutena. Sorpresa izango da!
Jarduera paraleloak
Filmen emanaldiez gain, Zinegin festibalak bestelako proposamenak barneratu ditu aurtengo egitarauan. Txalaparta eta musika elektronikoa uztartzen dituen Mäirü talde ziburutarrak trantzean sartuko ditu urriaren 21ean bertaratutakoak, eta ondotik Anize Ameztoi hazpandarraren sorkuntzak ezagutzeko aukera egongo da.
Bestalde, igande gauean Peru Galbetek ura hartu zuten haurtzaroko diapositiba zaharrak berpiztuko ditu, Uraren Oldea zine-kontzertu intimistan. Lukas Hiriartek, bere aldetik, film labur baten muntaketa nola egin erakutsiko du mush up tailerrean.
Ezagutu egunez eguneko egitaraua, jarraian.
