Irailaren 22an Urnietan hasi, eta azaroaren 19ra bitartean, Hego Euskal Herriko eta Espainiako lurraldeko 16 herritan 26 saio egingo dituzte. Bestalde, BBK Mendi Film Bilbao Bizkaiaren 15. Edizioko sarreren salmenta irailaren 16an martxan jarriko dutela aurreratu dute.
Pandemia bolada atzean utziz, BBK Mendi Film Bilbao Bizkaia zinema jaialdiko lan onenak erakustea helburu duen zirkuitu ibiltariak 7.100 ikus-entzule batu ditu urtarriletik ekainera bitartean. Ataunen hasi zuen ibilbidea, eta 29 geltoki izan ditu. Guztira, 60 zinema saio atondu dituzte, eta udan atseden hartu ostean, Urnietako Sarobe antzokian egingo du berragerpena, irailaren 22an.
16 herritan barrena zabalduko dituzte 2021eko BBK Mendi Film Bilbao-Bizkaia zinema jaialdian erakutsi zituzten lan onenak, 26 saio eskainiz. Mendiak-1976, Black Ice, Jötunn, Amagana, The Wall of Shadows, Le Cavalier Mongol, The Traverse, Action Directe, La Pantalla Andina… mendia eta natur gaiak dituzten film ikusgarrienak bueltan dira.
Jarraian udazkenean Mendi Tour zirkuitu ibiltariak izango dituen saioak:
- Irailak 22: Urnieta
- Urriak 3tik 5era, Santander
- Urriak 14: Puntaik-Punta Arrasate
- Urriak 16: Getaria
- Urriak 17tik 20ra: Madril
- Urriak 17 eta 18: Leon eta Salamanca
- Urriak 21: Santa Brigida (Kanariar Uharteak)
- Urriak 29: Sopela
- Urriak 30: Markina-Xemein
- Azaroak 5: Teruel
- Azaroak 10 eta 11: Errenteria
- Azaroak 12: Torrelavega
- Azaroak 15: Basauri
- Azaroak 16 eta 17: Gasteiz (EHU – Geo Mendi Tour)
- Azaroak 18 eta 19: Potes
Abendua begi-bistan
Hamabosgarrenez ospatuko dute mendia eta abentura uztartzen dituen BBK Mendi Film Bilbao-Bizkaia zinema jaialdia. Urtero legez, abenduan izango da, aurten, hilaren 9tik 18ra bitartean, eta lanak aurkezteko epea irailaren 15ean bukatuko da.
Sarreren salmenta, aldiz, irailaren 16an jarriko dute martxan. Urtero legez, hiru alditan egin ahalko da: lehenenik, urri erdira arte, abantaila eta prezio merkeagoekin; bigarrenik, azaro erdira arte; hirugarrenik, festibala hasi bitartean.
