Punto de Vista Nafarroako Zinema Dokumentaleko Nazioarteko Jaialdiak 2022ko edizioak jasoko dituen bi atzera begirakoen berri eman du. Marokoko zinemaren hastapenak ezagutu eta ibaietako bizitzari buruz hausnartzeko tartea egongo da martxoaren 14tik 19ra bitartean.
Hamaseigarren edizioa ospatuko du 2022an Iruñeko Punto de Vista jaialdiak, eta sail lehiakorrez gain, zinematografia edota gai zehatzen inguruko “bi ziklo miszelaneo” programatuko dituzte: Nork azalduko du historia? Zinema dokumentalaren hastapenak Marokon eta Topaketa ibaian. Ekitaldia martxoaren 14tik 19ra antolatuko du NICOD sozietate publikoak, ohi bezala, Nafarroako Gobernuaren laguntzarekin.
Marokoko zinemaren historia ezagutzeko aukera emango du aurrenekoak, dokumentalen proiekzio, solasaldi eta hizketaldien bidez. Aldi berean, Ahmed Bouanani (1938 – 2011) zinemagile, ikertzaile eta idazleak argitaratutako La septième porte: Une histoire du cinéma au Maroc de 1907 à 1986 liburuaren gaztelaniazko itzulpena aurkeztuko dute. Espainiako eta Frantziako kolonizazioaren ondoren, Marokoko zinemaren historiari buruz idatzitako lehen liburua da lehen atzera begirakoaren abiapuntu zein ardatza, 35 urtez argitaratu gabe egon dena.
Liburuaren editore eta New Yorkeko Cooper Unioneko irakasle den Omar Berrada, eta Ali Essafi zinemagile, programatzaile eta Marokoko dokumentalen historiari buruzko ikertzailea dira zikloaren komisarioak, eta gonbidatu bereziak ere bertaratuko direla aurreratu dute: Touda Bouanani (Ahmed Bouanani-ren alaba) eta Léa Morin, Cinémathèque de Tánger-eko zuzendari ohia eta Casablancako L´Atelier de l´Observatoire erakundeko zuzendaria, gaur egun. Atzera begirakoan ondoko filmak emango dituzte: Ahmed Bouananik zuzendutako Tarfaya ou la marche d’un poète (1966), 6 & 12 (1968), Mémoire 14 (1971), De chair et d’acier (1959); Mohamed Afifi zinemagilearen Retour à Agadir (1967); eta 60ko hamarkada bukaeran errodatutako hainbat film labur.
Bigarren zikloak, aldiz, Miriam Martín programatzaile eta zinemagilea du komisario, eta ibaietako bizitzari eta ibaien inguruan bizi eta lan egiten dutenei buruzkoa da. Dokumentalez gain, fikzioak eta zinema esperimentaleko piezaren bat ere proiektatuko dira, munduko ibaietan barrena ibilbide bat eginez. Jaialdiko programazio ildo berria da aurten abiatutakoa, eta Nafarroako herritarrengana iristea du helburu.
Sei saio izango ditu programak: Fischfang in der Rhön (an der Sinn) (Ella Bergmann-Michel, 1932), The River (Pare Lorentz, 1938), La canta delle marane (Cecilia Mangini, 1961) eta An-Nil oual hayat (Youssef Chahine, 1964). Emanaldi guztien ondoren solasaldi bat izanen da ikus-entzuleekin, programatzaileak bideratuta, eta kasuren batean hainbat eremutako gonbidatuak ere ekarriko ditugu topaketak egiteko.
Informazio osagarria, Punto de Vista festibalaren webgunean.
