Donostiako Kresala Zineklubak, datorren denboraldian ospatuko duten zineklubaren 50. urteurrenaren aurretik, denboraldiko azken emanaldi sorta egingo du ekainean. Hiru film izango dira ikusgai, lehena, Wong Kar Wai zinemagileari eskainitako atzera begirako zikloko azken lana: Happy Together (1997).
Udako geldialdiaren aurretik, Kresala Zineklubak hiru emanaldi interesgarri eskainiko ditu ekainean. Hong Kongen, Sobietar Batasunean eta Espainian ekoitzitako lan bana izango da ikusgai, drama erromantiko bat, II. Mundu Gerran girotutako drama psikologiko bat eta Mediterraneoan giroko komedia dramatiko bat, hurrenez hurren. Hala, proposamen garaikideetatik aldendu eta 90eko, 80ko eta 50eko hamarkadetara egingo dute jauzi ikusleek, film klasiko bezain enblematikoez gozatzeko.
Lehen saioa ekainaren 1ean egingo dute, eta Wong Kar Wai zinemagilearen zikloko azken proposamena bistaratuko dute, Lai Yiu-Kai eta Ho Po-Wing maitaleen harremanaren gainbehera aztergai duen Happy Together kultuzko lana. Zinemagileak Cannesko zinemaldiko zuzendari onenaren garaikurra erdietsi zuen 1997an film honegatik, eta nazioarteko kritikaren zein ikusleen onespena jaso zuen.
Hilaren 15ean, aldiz, Elem Klimovek 1985ean aurkeztutako Idi i smotri (Ven y mira) drama belikoa proiektatuko dute Trueban. II. Mundu Gerrako aliatuen garaipenaren 40. urteurrenaren harira enkarguz osatutako filma da, eta Bielorrusiako herrixketako erailketa sistematikoak haur batengan izandako eragina du aztergai. Moskuko Nazioarteko Zinema Jaialdian Fipresci saria eskuratu zuen.
Hilabeteko azken emanaldian, ekainaren 22an, azkenik, Luis García Berlangaren Calabuch komedia dramatikoa bistaratuko dute, denboraldia ixteko film ezin hobea, Kresalako ikusleek eurek aukeratutako izenburua baita, sortzaile valentziarraren jaiotzaren ehungarren urteurrenaren harira proposatutakoa. Hamilton irakasleak Mediterraneoko herrixkara egingo duen ihesalditik abiatutako ikus-entzunezko ederra.
Filmen ordutegiak unean-unean zehaztuko dituztenez, Kresala Zineklubaren sare sozialetara adi egoteko galdatu dute antolatzaileek. Gainerako informazioa, halaber, haien webgunean dago eskuragai.
