Izen aldaketa iragartzearekin batera aurkeztu dute Donostia Zinemaldiaren Zinema Ikasleen Nazioarteko Topaketaren XVII. edizioa. 2018ko irailaren 24tik 28ra egingo dute, zinemaldiak hartuko duen asteko astelehenetik ostiralera. Lehiaketarako izen ematea zabaldu dute jada.
Donostia Zinemaldiak eta Tabakalerak antolatuta, Zinemaldiaren sail garrantzitsuenetako bat da Nest. Film Students bezala berizendatutakoa. Parte hartzen duten ikasleek haien sorkuntza lanak erakusten dituzte, zabalkunde espazio bat ematen zaie, eta, halaber, topaketaren esparruan egiten diren bilera profesional zein tailer eta eskola magistraletan parte hartzen dute.
Munduko zinema ekitaldi nagusienetariko baten markoaz baliatuta, ikus-entzunezkoen arloko esperientziak sortu eta elkarbanatzea du xede topaketak, eta mundu osoko zinema ikasle gazteak galdegiten dituzte parte hartzera. Horrela, gehienez ere hiru film labur aurkeztu ditzake ikastetxe bakoitzak, baldin eta azken bi ikasturteetan egindakoak diren. Hilabete iraungo du lanak bidaltzeko epeak, uztailaren 2ra arte, eta jasotako proiektuen artetik hautatutako hamabost finalistek hartuko dute parte topaketan.
Lehiaketan parte hartu duten ikastetxeetako ikasleekin osatutako epaimahai batek aukeratuko du Panavision Sariaren irabazlea. Saria eskuratzen duen ikasleari RED Epic kamerari dagokion ekipamendu osoa eta Primo lehia estandarrak lagako zaizkio lau astez grabatzeko. Nahiago badu, ordea, 10.000€-ko kreditua jasoko du, Panavision etxearen edozein material alokatzeko.
Bestalde, Orona Saria jasoko du topaketako film labur berritzaileenak, 5.000 €-ko ordainsaria. Euskal zinema ikastetxeetako ikasleek hautatuko dute irabazlea, Mondragon Unibertsitateko HUHEZI Fakultateko irakasle baten koordinazio eta Orona Fundazioaren Garapenerako Zuzendaritzaren gidaritzapean.
Zabalik da jada proiektuen oline bidezko izen ematea, Donostia Zinemaldiaren edo Tabakaleraren webgune ofizialetan. Aurrez aipatu bezala, uztailaren 2an amaituko da filmak aurkezteko epea.
