I am not Madame Bovary
Iazko Donostia Zinemaldian film onenaren Urrezko Maskorra eta emakumezko aktore onenaren Zilarrezko Maskorra jaso zituen Txinatik datorren filmak. Hori gutxi balitz, Torontoko Jaialdian ere FRIPESCI saria eskuratu zuen iaz. Dena den, denetariko iritziak eragin ditu, eta bada lana aspergarria iruditu zaionik ere. Filmak Li Xuelian emakumearen hamar urteko borroka kontatuko du. Andrazkoak dibortzio bat asmatuko du apartamentu bat eskuratzeko, baina gizona berriz ezkonduko da, eta gauzek okerrera egingo dute. Hamar urtez luzatuko den borrokaren ondoren, gizakion gabeziez jabetuko da Li Xuelian.
Aquarius (Doña Clara)
Nazioarteko hainbat jaialditatik, hala nola, Cannes, Habana eta Valladolideko festibaletatik, igaro da Kleber Mendonça Filhoren lana. Clara, 65 urteko musika kritikari ohia, 1940an eraiki zuten Recife hiriko Aquarius eraikin berezian bizi da. Egun batetik bestera, etxebizitza-agentzia batean lan egiten duen gizon batek eraikineko pisu guztiak erosiko ditu, baina Clarak uko egingo dio bere etxea saltzeari. Ondorioz, agentziarekin borrokan hasiko da, eta tirabirek bere bizitzarengan, iraganarengan eta maite dituenengan pentsatzera eramango dute.
Asphalte (La comunidad de los corazones rotos)
Elle (Paul Verhoeven, 2016) eta L’avenir (Mia Hansen-Løve, 2016) lanengatik saritu duten Isabelle Huppert aktore frantziarra da filmeko protagonistetako bat. John Mckenzie astronauta Parisko aldirietako eraikin baten gainean eroriko da. Bertan hainbat bizilagunekin egingo du topo, tartean, Jeannekin (Isabelle Huppert). Filmak bizilagunen arteko harremanak islatuko ditu. Samuel Benchetriten drama egokitutako gidoi onenaren Cesar saria jasotzeko hautagaia izan da aurtengo Cesar sarietan.
Land of Mine (Bajo la arena)
Danimarkatik, ostera, Martin Zandvlieten Under sandet (Land of Mine) gerra giroko drama helduko zaigu, iaz ingelesaz besteko hizkuntzetan errodatutako film onenaren Oskar saria eskuratzeko hautagaia izan zena. Filmak Bigarren Mundu Gerra osteko pasarte ezezagun bat azaleratu du: Danimarka mendebaldeko kostan, nazien armadak lurperatutako milaka mina jasotzera behartu zituzten soldadu alemaniar gazteen istorioa. Filmak presoek jasandako tratu txarrak erakutsiko ditu.
Keeper (9 meses)
Guillaume Senezk, ostera, hamabost urteko Maxime eta Melanieren arteko maitasun istorioa izango du ardatz Keeper filmean. Sentikortasun handiz, bi gazteek euren sexualitatea elkarrekin nola esploratzen duten erakutsiko digu. Egun batean, baina, Melaniek haurdun dagoela jakingo du, eta haurdunaldia eteteko ala harekin aurrera jarraitzeko erabakiak bi sendiak nahastuko ditu. Kacey Mottet Klein eta Galateá Bellugi aktore gazteek antzeztu dituzte pertsonaia nagusiak.
Uncle Howard
Howard Brookner zinegileari buruzko dokumental biografikoa. Zuzendaria 1989an hil zen New Yorken, HIES gaitzaren ondorioz. Bere azken lana izango zenaren postprodukzio fasean zegoen garai hartan, eta heriotzaren ostean, William Burroghsen bunkerrean gorde zuten material guztia. Ia 30 urte geroago, Brooknerren iloba Aaronek osabaren istorioa eta haren memoria gogora ekarri nahiko ditu.
https://youtu.be/s9Z_gIbIP2I
The Founder (El fundador)
50eko hamarkadan, Richard eta Maurice McDonald anaiek hamburgesa jatetxe bat zuten Kalifornia hegoaldean. 30 segundotan prestatzen zituzten jatekoak. Ray Kroc izeneko Illinoiseko saltzailea harrituta geratu zen bi anaiek zuten sistema azkarrarekin, eta frankizia arrakastatsu bat irudikatu zuen bere baitan. Esan eta egin: McDonald anaien ideia bereganatu, eta egungo janari azkarraren imperio bilakatu den McDonald’s katea sortu zuen. John Lee Hancocken gidaritzapean aritu dira Michael Keaton, Laura Dern, Nick Offerman, Linda Cardellini, Patrick Wilson eta B.J.Novak aktoreak.
Gold (La gran estafa)
Eta AEBtan jazotako istorio erreal batetik, beste batera: 80ko hamarkadan, Kenny Wells porrot egindako negozio-gizona esploratzaile moderno bilakatu zen, patua aldatzeko asmoz, geólogo batekin elkartu eta Indonesiako oihan ezkutuetan urrea bilatzen hasi zenean. Matthew McConaghey eta Edgar Ramirezek antzeztu dituzte bi pertsonaia nagusiak, Stephen Gaghanen aginduetara.
https://youtu.be/IhYROWOayLw
Kong: Skull Island (Kong: La isla calavera)
King Kong gorila erraldoiari buruzko enegarren filma zuzendu du Jordan Vogt-Robertsek. Tom Hiddleston, Brie Larson, Samuel L. Jackson, John Goodman eta John C.Reilly izarrek osatutako esploratzaile taldea mapetan azaltzen ez den Ozeano Bareko uhartea ikertzera joango da, King Kongen lurretan sartzen ari direla jakin gabe.
Zona hostil
Afganistango gerran girotutako drama espainiarra, Ariadna Gil, Roberto Álamo, Raúl Mérida, Antonio Garrido eta Ingrid García Johnsson aktore ezagunak buru dituena. Espainiako legioak konboi amerikar bat eskoltatu beharko du Afganistan iparraldean, baina mina batek eztanda egingo du eta bi soldadu amerikar zaurituko dira. Varela sendagilea eta haren taldea haiei laguntzera joango dira helikopteroan, baina lurreratzerako unean arazo bat izango dute, eta helikopteroa kaltetu egingo da. Gauarekin batera, etsaiak helduko dira, eta bizirik irteteko aukera bakarra, egunsentira arte irautea izango da.
Rudorufu to ippai atttena (Gatos. Un viaje de vuelta a casa)
Eta estreinaldiekin amaitzeko, Japoniatik helduko zaigun animaziozko lana. Rudolf katu beltza bere jabearengandik aldenduko da eta Tokiora helduko da. Bertan, ingurukoak izututa dituen Ippai-attena katua ezagutuko du, eta berarekin bizitzen hasiko da. Mikinori Sakakibarak eta Kunihiko Yuyamak zuzendu dute filma.
https://youtu.be/odOSRHOOlQA
