Frágil equilibrio
Goya Sarietan Dokumental Onenaren Saria jaso du Guillermo García López zuzendari espainiar gaztearen dokumentalak. Gizarte garaikidea hartzen ari den bideaz eta harremantzeko moduaz gogoeta egingo du dokumentalak. Hiru kontinentetako hiru istorio gurutzatuko dira: lanean buru-belarri ariko den Tokioko enpresari baten bizitza, Europara iritsi nahiko duen Sahara hegoaldeko komunitate bat, eta etxegabetzeko zorian egongo den Madrilgo familia bat. Kultura, toki eta gizarte ezberdinetan zehar bidaia. Uruguaiko presidente izandako Pepe Mujikak jarriko dio ahotsa dokumentalari.
Batman Lego (euskaraz)
Zineuskadiren Zinema Euskaraz programaren baitan, Batman Lego filma euskaraz ikusteko aukera izango da gurean Iruñea, Bilbo, Getxo, Donostia, Errenteria, Usurbil, Gasteiz eta Barakaldoko zinema aretoetan. Warner Bros Picturesek ekoitzitako proiektuak super-heroien munduan murgilduko gaitu. Batman bere burua taldeko lidertzat duen pertsonaia dugu filmeko protagonista. Gotham hiria aldaketak jasaten ariko da, eta Batmanek Joker zitalaren konkistatik salbatu nahiko du hiria. Horretarako, bakarka aritzeari uko egin eta elkarlanean lan egiten ikasi beharko du, urduritasunak alde batera utzita eta lasaitzen ikasiz.
Moonlight
Nazioarteko hemezortzi jaialditan sariak eskuratzeko hautagaia izan da Barry Jenkins zuzendariaren filma. Aktoreei dagozkien kategorietan ez ezik, zuzendari, gidoi eta argazki zuzendari onenaren kategorietan ere proposatu dute, eta film onenaren Oscar saria jasotzeko faboritoen artean da. Giza harremanak landuko dituen film atenporalak, Miamiko (AEB) aldirietan haziko den protagonistaren historia kontatuko digu, haurtzarotik heldutasunera. Bizitza garaikide afroamerikarraren egunerokoa gertutik biziko dugu. Identitatea, familia, laguntasuna eta maitasunari buruzko gogoeta pertsonal eta poetikoa.
Fifty Shades Darker
E.L. Jamesen trilogia literarioan oinarrituta dauden Fifty Shades of Grey filmaren bigarren zatia Balentin Deunarekin batera helduko da zinema aretoetara. Zuzendari berria du proiektuak, James Foley. Eta dirudienez, datorren urtean kaleratuko duten hirugarren eta azken lana ere berak gidatu du (Fifty Shades Freed). Graduatu berri den Anastasia Steele ikaslearen eta negozio-gizon Christian Greyren arteko harremana kolokan egongo da. Anastasia estu sentituko da Greyk beragan duen boterearen ondorioz, eta harremana moztea erabakiko du. Seattleleko editorial batean hasiko da lanean. Baina Grey bere bila itzuliko da, maite duela eta eskatzen diona egiteko prest dagoela aginduz. Anastasiak Greyren iraganeko emakumeen eta beldurren aurka borroka egin beharko du.
Fai bei sogni (Felices sueños)
Ibilbide luzea duen Marco Bellocchio zuzendari italiarraren lan berria. Turin, 1969. Massimo bederatzi urteko haurraren haurtzaro idilikoa deuseztu egingo da amaren heriotza misteriotsua dela eta. Umeak uko egingo dio amaren galerari, ez du sinistu nahiko. Urte batzuk geroago, kazetari trebe bilakatuko da, eta Sarajevoko gerran erreportari moduan lanean ari dela, izu-ikara erasoak pairatzen hasiko da, bere iraganagatik. Hori dela eta, Elisa medikuak lagunduko dio haurtzaroko zauriei aurre egiten.
Rings
Ring saga beldurgarriko kapitulu berria ere bihar helduko da zinema aretoetara. Mutil-laguna kontu ilun batean nahastuta dagoela jakingo du neska gazte batek: bideo zinta bat ikusten duten lagunak zazpi egunera hiltzen dira, eta bikotekidea mundu beldurgarri hori ikertu nahian ibiliko da. Hura salbatzeko, bere burua sakrifikatzea erabakiko du neskak. Inor ohartu ez denaz konturatuko da orduan: zintaren barnean inork ikusi ez duen beste bideo bat dago.
https://www.youtube.com/watch?v=mZBLbeDtpaE
