La danseuse (La bailarina)
Stéphanie Di Giustok Cannesko jaialdiko Un Certain Regard sailean aurkeztu zuen filma urte hasieran. Loïe Fuller AEBtako ballet dantzariaren biografia da La danseuse. Izan ere, Belle Epoque garaian, eta inork espero gabe, Parisko Operako dantzaria izan zen Fuller, bizkarreko minak eta begietako gaitz bat zituen arren. Ikuskizunak sortu eta garatzen zituen, eta oso harrera ona izan zuen. Baina Isadora Duncan dantzari gaztearen etorrerak tronutik kendu zuen. Soko ezizenarekin ezagun egin zen Stéphanie Sokolinski abeslari eta aktore frantziarrak antzeztu du filmeko paper nagusia.
Sully
Clint Eastwooden film berria 2009an New Yorken jazotako hegazkin istripuan oinarrituta dago. Chelsey Sullenberger pilotuak, aireportutik irten eta berehala, matxura bat izan zuen hegazkinean, eta hegaldiko 155 bidaiariak salbatzeko, Hudson ibaian hartu zuen lur maniobra arriskutsuak eginez. Lehen unean heroitzat hartu bazuten ere, pixkanaka, gertaeraren inguruko datuek zalantzan jarri zituzten Sullyk hartutako erabakiak. Tom Hanks, Aaron Eckhart, Laura Linney eta Anna Gunn, besteak beste, aritu dira Eastowooden aginduetara.
100 metros
Marcel Barrena zinegile espainiarrak idatzi eta zuzendu du Dani Rovira eta Karra Elejalde protagonista dituen gertaera errealetan oinarritutako drama. Lanak Ramón Arroyoren istorioa kontatuko du: 30 inguruko familia-gizona, lanean gogor ariko da egun batean esklerosi anizkoitza diagnostikatuko dioten arte. Urtebeteko epean 100 metro oinez egiteko gai izango ez dela azalduko diote sendagileek, eta horren aurrean, munduko kirol probarik gogorrenean parte hartzea erabakiko du Ramónek, aitaginarreba marmartiaren laguntzarekin: Iron Man delako lasterketan.
Blair Witch
Sitgesko zinema jaialdiko Sail Ofizialean aurkeztu berri du Adam Wingard estatubatuarrak bere lan berria, The Blair Witch Project ezagunaren bigarren atala. Oraingoan, gazte talde bat Black Hills izeneko Marylandeko (AEB) basoan sartuko da, Blaireko sorginaren kondairarekin zerikusia izan dezakeen Jamesen arrebaren desagerpena ikertzera. Bertan bizi den bikote batek laguntza eskainiko die.
Eat That Question: Frank Zappa in His Own Words
Frank Zappa musikagile, gitarra-jotzaile, abeslari, ekoizle eta zinema zuzendari estatubatuarraren biopica egin du Thorsten Schütte zinegile frantziarrak. Orain arte argitaratu gabeko irudiak erabili ditu ikus-entzuleak XX. mendeko ikono izandakoaren errealitatera eta sormenera hurbiltzeko.
One Piece Gold
Hiroaki Miyamotok One Piece animaziozko telesail ezaguna pantaila handira eraman du. Luffy eta gainerako piratak Altxor Handia izeneko urrezko itsasontzira joango dira. Bertan, munduko gobernuetatik urrun, jokoan aritzen dira pirata, marinel eta bestelako aberatsak. Baina itsasontziaren jabeak, diru-goseak eraginda, diru gehiago nahiko du, eta horrek munduko herrialdeen arteko botere-harremanak arriskuan jarriko ditu.
https://youtu.be/7zaKkTRs8Q8
El destierro
Espainiako Gerra Zibilean girotutako filmeko protagonistak dira Teo eta Silverio. Zaintza postu txiki batera bidaliko dituzte biak, mendira, eta sei hilabetez elkarrekin bizi beharko dute. Oso nortasun ezberdinak dituztenez, bi gizonen artean tentsioa izango da nagusi, baina egoera zailagoa bihurtuko da Silveriok Zoska izeneko emakume poloniarra erreskatatuko duenean, eta haien gotorlekura eraman. Joan Carles Suau, Eric Francés, Monika Kowalska eta Chani Martín aktoreek hartu dute parte Arturo Ruiz Serranok gidatutako filmean.
Sleeping with Other People (Nunca entre amigos)
Hamabi urte lehenago elkarrekin birjintasuna galdu zutenetik, Jake eta Lainey desleialak izan dira haien bikotekide guztiekin. Egoerarekin nazkatuta, Laineyk sexuarekiko mendekotasuna duten pertsonentzako bilera batera joatea erabakiko du New Yorkera. Eta bertan Jakekin egingo du topo. Elkarri lagundu nahiko diote, baina pixkanaka, elkar erakarriko dute. Lesley Headlandek gidatutako komedia erromantiko amerikarra.
Merci patron! (¡Gracias jefe!)
Jocelyne eta Serge Klurrek arazoak dituzte: haien enpresa Poloniara bidali dutenez, langabezian geratu dira, eta zorrez lepo daude, etxea galtzekotan. Fakir egunkariko sortzaile (eta dokumentalaren zuzendari ) François Ruffinek, baina, laguntza eskainiko die.
