Hirugarren urtez, Zinegabonak ekimena martxan jarri du Zineuskadik, Gabonetan haurrek euskarazko zinemaz goza dezaten. 11 animaziozko film proiektatuko dituzte Euskal Herriko hainbat hiritan abenduaren 28tik urtarrilaren 3ra, eta berrikuntza gisa, bikoizketa tailerrak eskainiko dituzte aurtengoan, bikoizle profesionalen eskutik.
Donostia, Iruñea, Gasteiz, Bilbo eta Urruñako hainbat aretotan proiektatuko dituzte Zinegabonak zikloko filmak abenduaren 28tik hasi eta urtarrilaren 3a bitarte. Orotara 11 film ikusteko aukera izango dute haurrek, guztiak euskaraz, Zineuskadik hirugarren urtez antolatzen duen ekimen honen bidez.
Hasteko, abenduaren 28, 29 eta 30an, EiTBren Bilboko egoitzako Multibox aretoan hiru film eskainiko dituzte goizeko 11:00etan. Emanaldi horietako bakoitzera joateko 300 sarrera zozkatu ditu EiTBk dagoeneko.
Urteko lehen asteburuarekin batera, urtarrilaren 2an eta 3an, honako filmak proiektatuko dituzte Euskal Herriko hainbat zinema aretotan, euro baten truke: 7. ipotxa (Harald Siepermann eta Boris Aljinovic, 2014), Magiaren etxea (Ben Stassen eta Jeremy Degruson, 2013), Hurrak eta lapurrak (Peter Lepeniotis, 2014), Zipi-Zape eta kanikaren kluba (Oskar Santos, 2013), Doraemon, Stand by me (Takashi Yamazaki eta Ryüichi Yagi, 2014), Tom txikia eta ispilu magikoa (Ernesto Padrón, 2014) eta Yugo & Lala (Yunfei Wang, 2014).
Aurtengo berrikuntza nagusia haurrei zuzendutako bikoizketa tailerrak izango dira. Abenduaren 28tik 30ra, Bilbon, Donostian eta Gasteizen filmetako pasarteak nola bikoizten diren ikasiko dute haurrek, bikoizketa-aktore profesionalen eskutik. Nahi dutenek, halaber, ahotsa grabatzeko aukera izango dute.
Animaziozko filma guztiak euro bakarrean eta goizeko 11:00etan proiektatuko dira. Programazioa honakoa izango da:
ABENDUAK 28
- Marko Makako – Bilbo, EITBren egoitza Multibox Aretoa
ABENDUAK 29
- Asterix – Bilbo, EITBren egoitza Multibox Aretoa
ABENDUAK 30
- Dragoi Bola – Bilbo, EITBren egoitza Multibox Aretoa
URTARRILAK 2
- 7.Ipotxa – Bilbo, Golem Alhondiga
- Hurrak eta lapurrak – Donostia, Principe Zinemak
- Stand by me Doraemon – Gasteiz, Florida Zinemak
- Magiaren etxea – Iruñea, Golem Baiona
- Yugo&Lala – Urruña, Itsas Mendi
URTARRILAK 3
- Magiaren etxea – Bilbo, Golem Alhondiga
- Zipi-Zape – Donostia, Principe Zinemak
- Tom txiki – Gasteiz, Florida Zinemak
- 7.Ipotxa – Iruñea, Golem Baiona
- Haritzaren bihotza – Urruña, Itsas Mendi
Info+: Programazio osoa
