Zinema eta surfa uztartuko dituen jaialdi berria dugu gurean, Zarautz Surf Zinema. Ostiraletik igandera, urriaren 2tik 4ra, luzatuko da lehen edizioa, eta sei dokumental eskainiko dituzte orotara Zarauzko Modelo aretoan. Gainera, Aritz Aranburu eta Indar Unanue surflariek, tartean, hartuko dute parte emanaldietan.
Ostiralean, urriak 2, Mario Hainzl eta Andreas Jaritzek zuzendutako The Old, the Young & The Sea (goian trailerra) 2013ko dokumentala eskainiko dute 19:30ean jaialdia zabaltzeko. Frantzia, Espainia eta Portugalgo hondartzetan barrena egindako bidaia kontatuko du lanak. Horren ostean, 22:00etan, Dorian ‘Doc’ Paskowitz surflariaren bizitzari buruzko Surfwise (Doug Pray, 2007) dokumentala proiektatuko dute.
Larunbatean, urriak 3, Tierra de patagones (Gauchos del Mar) eskainikko dute lehenik, 19:30ean, eta 22:00etan The Present eta Beyond The Surface lanen txanda helduko da. Lehena nazioarteko dozena erdi jaialditan saritu dute, eta Gauchos del Mar anaiek Txile eta Argentinako Patagoniara egindako bidaia kontatuko du, bertako olatu arriskutsuen bila. The Present, ordea, Thomas Campbellek gidatutako lana da, eta Beyond The Surface Ishita Malaviya, Crystal Thornburg-Homcy, Lauren Hill, Emi Koch, Kate Baldwin eta Liz Clark emakumezko surflariei buruzko 2014ko dokumentala da, Crystal Thornburg-Homcy eta David Homcyk zuzendutakoa.
Igandean, azkenik, Go Aritz dokumentala izango da ikusgai 17:00etan, Aritz Aranburu surflariak WCT txapelketan egindako ibilbideaz. Eta 19:30ean, azkenik, Jason Baffaren Bella vita eskainiko dute, iazko Donostia Zinemaldiko Savage Cinema sailean aurkeztu zuten filma. Chris del Moro eta haren lagunek Italiako kostaldean zehar egindako bidaia kontatuko du.
