Bart gauean itxi dugu Zinea.eus atarian kritikari gisa urtebetez jardungo duen laguna topatzeko deialdia. Orotara 10 kritika jaso ditugu martxoaren 11n deialdia zabaldu genuenetik, eta eskerrak eman nahi dizkizuegu parte hartu duzuen guztiei.
Bart gauean, martxoaren 31ko 00:00etan, zuetako bakoitzak zituen ‘Atsegin dut’ eta ‘Ez dut atsegin’ guztiak zenbatu ditugu. Baina, zoritxarrez, ezin ditugu datuok aintzat hartu, bozka-sisteman irregulartasunak egon direlako. Izan ere, erabiltzaile bakarrak egun berean kritika bera hainbat alditan bozkatu duela frogatu dugu. Zuetako batzuek ere halaxe jakinarazi diguzue.
Horregatik, hiru lagunez osaturiko epaimahaiaren eskuetan utziko dugu irabazlea nor den erabakitzeko ardura. Ez ditugu epaimahaikideen izen-abizenak argituko behin betiko irabazlea nor den jakin arte, izan ere, haiengana hel zaitezten eragotzi nahi dugu, berriz ere arazorik sor ez dadin. Seguru gaude erabaki garbi eta ahalik eta objektiboena hartuko dutela bakoitzak bere aldetik. Adierazi genuen bezala, kritika guztie 0 eta 5 arteko balioa emango diote, eta ondoren puntu guztiak batuko ditugu.
Honenbestez, kritika guztiak irakurri eta baloratzeko tartea emango diegu epaimahaikideei, eta apirilaren 13tik 17rako astean jakinaraziko dugu nor den irabazlea. Irabazlearen izen-abizenen berriarekin batera, halaber, epaimahaikideak zein izan diren argituko dugu.
Beraz, zorte on aurkeztu zareten guztioi!
