Larrotxene Bideo ikastaro sortako ikasle zein irakasleek eta ikus-entzunezko hainbat gazte profesionalek osatutako taldeak ekainaren 29an ekingo dio Maria Fontan zinemagilearen Zerua hautsi zen gaua film laburraren errodajeari. Oihua! sorkuntza ekimenaren irabazle izendatu zuten iragan otsailean gidoia, eta uztailaren 1era bitartean Oiartzunen ariko dira irudiak hartzen.
Igor Legarretak ekainaren 1ean berrekin dio Ilargi guztiak / Todas las lunas film luzearen filmaketari. Koronabirusaren krisiaren eraginez, osasun larrialdi egoera ezarri bezain laster lan-taldeak bertan behera utzi zuen errodajea martxoan, eta hiru hilabete pasa ondoren, lana berrartu ahal izan dute aktore eta teknikoek.
Espainiako Osasun Ministerioak konfinamendua malgutzen duen lehenengo fasera igaro diren lurraldeetan errodajeak berrartzeko baldintzak arautu ditu. Maiatzaren 9an Estatuko Aldizkari Ofizialean argitaratutako neurrietan jaso dituzte Hego Euskal Herrian egitekoak diren filmaketek bete beharreko neurriak (X. ataleko 29-32 artikuluetan irakur daitezke) eta protokoloak.
Helena Bengoetxea zinegile nafarrak Matrioskas dokumentalaren filmaketa-lanak eten behar izan ditu, koronabirusak eragindako osasun larrialdi egoeraren ondorioz. Habanan (Kuba) errodatzen ari ziren, eta krisiak eztanda egin bezain laster Iruñera itzultzea erabaki dute.
Igor Legarretak zuzendutako Ilargi guztiak. Todas las lunas film luzearen filmaketa bertan behera utzi du lan-taldeak, koronabirusaren krisiaren eraginez, osasun larrialdi egoera ezarri bezain laster. Filmaren taldeko kideen segurtasuna eta ongizatea bermatu nahian hartutako erabakia dela azpimarratu dute ekoizleek, hala, COVID-19ren hedapena geldiarazten laguntzeko gizarte-erantzukizuneko konpromisoarekin bat egin dute.
Igor Legarretak hasi ditu Ilargi guztiak. Todas las lunas bere bigarren film luzearen filmaketa-lanak. Euskaraz errodatutako fantasiazko lana izango da, eta Itziar Ituño zein Josean Bengoetxea izango ditu protagonista. Filmaren zuzendariak adierazi bezala, “pelikula argitasunera egindako bidaia epikoa da”.
2021ean estreinatuko dute Amazon Prime Videon 3Caminos telesaila, eta dagoeneko hasi dute lau hilabetez luzatuko den grabaketa fasea. Donejakue bidea ardatz izango duen ekoizpenak sei atal izango ditu, eta lehen irudiak Nafarroan hartu dituzte.
Dar Dar izango da Paul Urkijo gasteiztarraren film labur berria. Olaetan filmatu berri du ohiko kolaboratzaileekin batera, eta Almudena Cid du protagonista. Beldurrezko istorioa da, eta espresionismo alemaniarraren eraginpean errodatu du.
Drama eta komedia uztartzen dituen euskal road trip-a prestatu du Lara Izagirre zinemagile zornotzarrak, bere bigarren film luzea, eta abuztuaz geroztik Bizkaiako hainbat txokotan zein Lapurdin errodatzen ari dira. Nora da protagonista, bere lekua aurkitu nahi duen gaztea, eta lana 2020an estreinatuko dela aurreikusi dute.
Gipuzkoako lurralde osoko filmatzeetarako zerbitzua ahalbidetzeko bulegoa sortu ondorengo lehen urtean, 87 filmatze bideratu zituen hiriburuan eta lurraldeko herri ezberdinetan San Sebastian-Gipuzkoa Film Commisionek. 2019 urtea ere “urte historikoa” izango dela iragarri dute, 8,8 milioi eurotik gorako zuzeneko inbertsioarekin.
